Godajōm na nich roztomajcie - jedni - babcia, niyftorzi - ōma, a jeszcze inksistarka. Jejich chopy to dziadki, ōpy abo starziki. Niy wyglōndajōm tak samo ale jes cosik, co majōm jednake - SERCE. Jes wielke i ōtwarte do mola. Tym sercym nojbarzi przajōm swojym wnukōm - tym maluśkim, co jeszcze leżōm we pieluchach, tym ździebko starszym, kerych mamy kludzōm do szkōłki i szkolorzōm, i tym po maturze, a i tym żyniatym i dzieciatym. Zawdy majōm dlō nich czas.
Do starki idzie prziść ze szczaskanym kolanym, potarganymi rajtuzami, urwanym kneflym abo prōznym potmanejym. Ôna przituli, pochalo, wszysko poradzi naprawić, poratuje w biydzie. I chocioż jōm bolōm nogi, targo rojmatyka i łōmie we krziźu to nigdy sie niy użolo i niy wymowio chorōbskym. Starzik nauczy wnuka pyndalować na kole, pudzie pograć ś niym we fusbal, połosprawio jak to przodzi bōło. U starzikōw zawdy znojdzie sie cosik słodkigo abo (to dlo tych myńszych) jakosik nowo graczka. Takich starzikōw jo pamiyntŏm.
Dzisioj je jakby trocha inakszy. Babcie ciupnyły drŏtki, heknadle i jegły na tablety, mobilnioki i laptopy. Bajki włōnczajōm bajtlōm na e-bookach, chodzōm do roboty, farbujōm wosy, malujōm sie, łoblykajōm jak mode frelki i ze wnukami widzōm sie mało kedy - niyroz ino we feryje. Dzisiejsze starziki idōm na pyndzyjo niyskoro, a i wtynczōs jeszcze szukajōm jakisik roboty. Wnuki niy bardzo chcōm już ś niymi godać, bo zdo jym sie, iże starzik je stary daty - technicznie do zadku, fizycznie zawalaty. Możno to i prowda, ale jes coś, co zawdy i wszyndy jest blank take same - jejich serce.
Tōż niy przepōmnijcie, iże jutro (21 stycznia) jes Dziyń Babcie, a we piōntek (22 stycznia) Dziyń Dziadka. Znojdźcie dlō nich czas, podarujcie fajne blumy abo szekulada, abo ino jich ôdwiedźcie, wlyjźcie na kolana, uściskejcie, dejcie fajnego kusika. Ôni już niy umiōm sie na to doczkać. Wiym coś ło tym, bo sama żech jes babciōm.
Brak komentarzy:
Prześlij komentarz