Nō i mōmy zima. Powiy ftoś, iże Hameryki niy ôdkrōłach, dyć przeszła już poła stycznia, a kożdy, nawet bajtel we szkōłce wiy, co jak je styczyń, to je zima. Niby prowda, ale jakby my mieli kōmuś połosprawiać, jak ôna wyglōndo to bōł by problym. Przeca jeszcze do niydowna bōło 8 - 10 stopni. Bez zima!!
Bardzi to pasuje do wiosny. A i inkszych znakōw zimy ze świyczkōm szło szukać. Pora dni tymu trocha sie zmiyniyło. Spod śniyg. Zrobiō sie bioło. Choć tak niy do kōńca, bo drōgi sōm do imyntu czorne, tretułary, tam kaj je robotny ficywert, tyż. A tego, co leży po rantach abo kajsik we parkach, tyż niy idzie mianować biołym śniegym, bo wiyncy w tym marasu i psiego "szczyńścio" niż śniega.
To już niy te zimy co za mojich modych lot. Wtynczos śniyg bōł już na Wszystkich Świyntych. I to niy tela co dzisioj, ale po kostki, abo i wiyncy. Drzewa ôsute śniegym wyglōndały choćby we bajce, mrōz niyrōz tak przicisnōł, iże szło sie dziwować ôkiynnym szybōm - take piykne na nich byli korōnkowe mroźne mustry. Bajtlōm mrōz wcale niy zawodzoł. Chodzili my ze szlyndzuchami na klojzdōwki, na gōrki posjyżdżać na sōnkach, na bojisko lepić bałwana, abo pociepać sie kulkami ze śniega. Lica my mieli czerwōne jak maliny, śpikole wisiały aż do brody, ale żodyn niy szkamroł, choć szlyndzuchy trza bōło przikryncać kurblōm do szczewikōw, a sanki szmarować świyczkōm coby gibci jechały.
A dzisioj szlyndzuchy muszōm być pod kolor ôblyczo, sznōrki pod kolor szczewikōw, w gōry ze nartami sie jedzie coby sie pokozać "na stoku" i poasić, a jak je -10 to nojlepsze sōm narty, sanki i szlyndzuchy we grach komputerowych. Chciało by sie westchnōńć: "o tempora,o mores!".
Brak komentarzy:
Prześlij komentarz